حكومەتی هەرێم بڕیارێك لەبەرژەوەندی مامۆستایان دەردەكات

حكومەتی هەرێم بڕیارێك بۆ باشتركردنی بژێوی فەرمانبەرو مامۆستایان دەردەكات، سەرۆكی یەكێتی مامۆستایانیش ڕایدەگەیەنێت: “مافی خۆمانە هەموو ڕێكارێك بگرینەبەر بۆ دەستەبەركردنی مافەكانمان”.

عەبدولواحید محەمەد، سەرۆكی یەكێتی مامۆستایانی كوردستان، بە SNNی ڕاگەیاند: بەهەماهەنگی لەگەڵ وەزارەتی پەروەردە، لەپەیوەندی بەردەوامداین لەگەڵ وەزارەتی دارایی و سەرۆكایەتی ئەنجومەنی وەزیرانی هەرێم بۆ باشتركردنی بژێوی مامۆستایان، ئەوانیش بڕیاریانداوە ڕۆژی یەكشەممە 25ی 3ی 2018 كۆبونەوەیەك ئەنجامبدەن، تا ئەم بارودۆخە هێوربكاتەوەو مامۆستایانیش قبوڵی بكەن”.

وتیشی: “وردەكاری بڕیارەكەی حكومەت و شێوازەكەی نازانین، بەڵام شتێك بۆ مامۆستایان دەكرێت و حكومەت بەنیازە بڕیارێك بدات كە بەرژەوەندی گشتی تێدابێت”.

سەرۆكی یەكێتی مامۆستایان هۆشداریشی لەبارەی چڕكردنەوەی فشارەكانیانداو ئاشكرایكرد: بەمافی خۆمانی دەزانین هەموو ڕێكارێك بەمەبەستی دەستەبەری مافەكانمان بگرینەبەر.

نووسراوه‌ له‌لایه‌ن
Raw Raw