Top Ad unit 728 × 90

ڕێكلامی بازرگانی (5000 / مانگانه‌)

Allow ADS

Please enable / Bitte aktiviere JavaScript!
Veuillez activer / Por favor activa el Javascript![ ? ]

“خوێندنی‌ كوردی‌ له‌كه‌ركوك له‌مه‌ترسیدایه‌، گه‌ر فریای‌ نه‌كه‌ون”

پاش ئه‌وه‌ی‌ پڕۆسه‌ی‌ خوێندن له‌قوتابخانه‌كانی‌ سه‌ر به‌ به‌شی‌ خوێندنی‌ كوردی‌ له‌كه‌ركوك به‌هۆی‌ ڕوداوه‌كانی‌ شانزده‌یی‌ ئۆكتۆبه‌ر ڕاوه‌ستا، له‌ 22-10جارێكی‌ تر ده‌رگای‌ قوتابخانه‌كان كرایه‌وه‌، به‌ڵام ژماره‌ی‌ ئه‌و مامۆستاو قوتابی‌ و خوێندكارانه‌ی‌ ڕویان له‌ناوه‌نده‌كان كرد وه‌ك پێویست نه‌بون، به‌ڕێوبه‌ری‌ به‌شی‌ خوێندنی‌ كوردی‌ له‌كه‌ركوك به‌وه‌كاله‌ت داوا ده‌كات “مامۆستایان وخوێندكاران بگه‌ڕێنه‌وه‌ بۆ قوتابخانه‌كانیان”.

ئا: سروه‌جه‌مال

كازم یه‌كێكه‌ له‌و مامۆستایانه‌ی‌ كه‌له‌ 22-10 گه‌ڕایه‌وه‌ قوتابخانه‌كه‌ی‌، به‌ڵام كاتێك ده‌بینێت ئاڵای‌ كوردستان له‌سه‌ر بینای‌ قوتابخانه‌كه‌یان هێنراوه‌ته‌خواره‌وه‌ ناتوانێت ڕێگه‌ له‌فرمێسكه‌كانی‌ بگرێت “به‌كوڵ گریام ئاڵای‌ زۆربه‌ی‌ قوتابخانه‌كان داگیراوه‌و ژماره‌یه‌كی‌ كه‌م له‌مامۆستایان و خوێندكاران ده‌وامیان كرد”.
كازم باسی‌ خراپی‌ بارودۆخی‌ ڕه‌وشی‌ په‌روه‌رده‌ ده‌كات به‌رله‌م ڕوداوانه‌ “له‌كه‌ركوك پێشتریش هه‌ر به‌ناڕێكی‌ په‌روه‌رده‌ بڕێوه‌ ده‌ڕۆیشت ئێمه‌ كاتێك ئه‌ندامی‌ لق بوین له‌یه‌كێتی‌ مامۆستایان زۆر هه‌وڵماندا ڕوبه‌ڕوی‌ ئه‌و بارودۆخه‌ ببینه‌وه‌، به‌ڵام حیزب باڵاده‌ست بو بۆیه‌ ڕێگه‌یان لێگرتین، بۆنمونه‌ به‌ڕێوبه‌ری‌ قوتابخانه‌یه‌ك له‌لایه‌نێكه‌و یاریده‌ده‌ره‌كه‌ی‌ له‌لایه‌نێكی‌ تر هه‌مو به‌شه‌كانی‌ خوێندنی‌ كوردی‌ دابه‌ش كراوه‌، هه‌روه‌ها له‌ناو مامۆستایاندا ژماره‌یه‌ك خاوه‌ن بڕوانامه‌ی‌ ساخته‌ هه‌بون زۆر هه‌وڵماندا لیسته‌كان له‌و مامۆستایانه‌ پاكژبكه‌ینه‌وه‌ به‌ڵام نه‌كرا، هه‌ندێك له‌و گرفتانه‌ی‌ هه‌بون ون بون، دوای‌ ئه‌وه‌ی‌ به‌شێوه‌یه‌كی‌ كاتی‌ خوێندنی‌ كوردی‌ دانرا چاره‌نوسی‌ مامۆستاكانی‌ و پڕۆگرامه‌كه‌ی‌ به‌سترایه‌وه‌ به‌هه‌رێمی‌ كوردستانه‌وه‌و بابه‌تی‌ پابه‌ندبونی‌ مامۆستاو شێوازی‌ تاقیكردنه‌وه‌ له‌به‌غداده‌وه‌ بو، بۆیه‌ خراپ به‌كارهێنانی‌ ده‌سه‌ڵات له‌ڕابردودا هۆكاری‌ ئه‌وه‌یه‌ كه‌ ئێستا ڕوده‌دات”.
ئه‌و مامۆستایه‌ به‌نیگه‌رانیه‌وه‌ وتی‌”نازانرێت چاره‌نوسی‌ مامۆستاكانی‌ چی‌ به‌سه‌ردێتو موچه‌ی‌ مانگی‌ ئابی‌ 2017و ئه‌وانی‌ تر له‌كوێوه‌ دێت، خوێندنی‌ كوردی‌ بۆ خۆی‌ له‌مه‌ترسیدایه‌و له‌داخستنه‌وه‌ نزیكه‌ ئه‌گه‌ر فریای‌ نه‌كه‌ون ئه‌ویش به‌ده‌ردی‌ ناوچه‌ دابڕێنراوه‌كان ده‌چێت، بۆیه‌ پێویسته‌ كه‌سایه‌تی‌ و سیاسیه‌كانی‌ كورد كارێك بكه‌ن تا خوێندنی‌ كوردی‌ له‌كه‌ركوك به‌ده‌ردی‌ ساڵه‌كانی‌ هه‌شتاكان نه‌چێت كه‌له‌ پڕدا داخراو منداڵی‌ كورد ناچاركران به‌زمانی‌ عه‌ره‌بی‌ بخوێنن كه‌ من یه‌كێكم له‌و قوربانیانه‌و له‌ پۆلی‌ چوار به‌كوردی‌ و له‌پۆلی‌ پێنج به‌عه‌ره‌بی‌ خوێندومه‌ چه‌ند قورسه‌ عه‌ره‌بی‌ نه‌زانیت و ناچارت بكه‌ن پێی‌ بخوێنیت”.
ئه‌حمه‌د كه‌ركوكی‌، ئه‌ندامی‌ سكرتاریه‌تی‌ یه‌كێتی‌ مامۆستایانی‌ كوردستان له‌باره‌ی‌ ره‌وشی‌ خوێندنی‌ به‌شی‌ كوردی‌ له‌كه‌ركوك به‌ئاوێنه‌ی‌ ڕاگه‌یاند “پڕۆسه‌ی‌ خوێندن له‌ 22-10ده‌ستی‌ پێكرده‌وه‌، به‌ڵام ده‌وامی‌ مامۆستایانو قوتابیان به‌پێی‌ پێویست نه‌بو، هه‌ندێك قوتابخانه‌ ده‌وامیان كردوه‌ و هه‌ندێكیش نێردراونه‌ته‌وه‌ بۆیه‌ هه‌وڵ هه‌یه‌ كه‌ ده‌وام ده‌ست پێبكاته‌وه‌ به‌هه‌ماهه‌نگی‌، چونكه‌ بارودۆخه‌كه‌ ترسی‌ هه‌یه‌، هه‌ندێك مامۆستاو قوتابی‌ تا ئێستا نه‌گه‌ڕاونه‌ته‌وه‌ به‌ڵام به‌گشتی‌ ئارامتره‌ به‌به‌راورد به‌ڕۆژانی‌ ڕابردو”.
هه‌رچه‌نده‌ به‌شێك له‌و خێزانانه‌ی‌ كه‌ كه‌ركوكیان به‌جێهێشتوه‌ پێیان وایه‌ هێشتا ڕه‌وشی‌ شاره‌كه‌ به‌و شێوه‌یه‌ نیه‌ كه‌بگه‌ڕێنه‌وه‌، ئه‌و ئه‌ندامه‌ی‌ یه‌كێتی‌ مامۆستایان ده‌ڵێت “هه‌رچه‌نده‌ ڕه‌وشه‌كه‌ له‌بارنیه‌ بۆ هه‌ندێك كه‌س بمانه‌وێت نه‌مانه‌وێت لایه‌نێك كه‌كشاوه‌ته‌وه‌و لایه‌نێك چۆڵی‌ كردوه‌، هه‌تا به‌رێوبه‌رێكی‌ تازه‌یان داناوه‌و سه‌رپه‌رشتیارو به‌ڕێوبه‌ری‌ قوتابخانه‌ش گۆڕاوه‌،پێشتر زۆر هاوارمان كرد با له‌سه‌ر بنه‌مای‌ حیزبی‌ پۆسته‌كان دابه‌ش نه‌كرێن هه‌ردو له‌ حیزبی‌ ده‌سه‌ڵات بون ئێمه‌ ڕه‌خنه‌ی‌ زۆرمان ده‌گرت، به‌ڵام به‌داخه‌وه‌ به‌هه‌ند وه‌رنه‌گیرا، بۆیه‌ ڕه‌وشی‌ په‌روه‌رده‌ساڵ به‌ساڵ به‌ره‌و دواوه‌ ده‌ڕوات ئه‌ویش به‌هۆی‌ ئه‌وه‌ی‌ خوێندنی‌ كوردی‌ سه‌ر به‌هه‌رێم بوه‌، ئه‌وه‌ چوارده‌ ساڵه‌ ئه‌و ڕه‌وشه‌ چاره‌سه‌ر نه‌كراوه‌ كه‌ ئه‌م دۆخه‌شی‌ به‌سه‌ر هات بێگومان لایه‌ك له‌گه‌ڵ لایه‌كی‌ تردا پارسه‌نگه‌كه‌ ده‌گۆڕێت”
ئه‌حمه‌د كه‌ركوكی‌ هیوخواداره‌ “خوێندنی‌ كوردی‌ نه‌گاته‌ قه‌یران هه‌رچه‌نده‌ ڕه‌وشه‌كه‌ به‌رو باشی‌ ده‌ڕوات، به‌ڵام گه‌ڕانه‌وه‌ی‌ مامۆستایان هه‌ر وا ئاسان نیه‌، بۆیه‌ پێویسته‌ ڕه‌وشه‌كه‌ ئارام بكرێته‌وه‌و ده‌بێت كه‌سی‌ شیاو له‌وشوێنی‌ شیاو دابنرێت، ده‌ست تێوه‌ردانی‌ حیزبی‌ نه‌مێنێت چونكه‌ زه‌ره‌ری‌ لێداوه‌ ئه‌گه‌ر بێ لایه‌ن بێت كێشه‌ی‌ نابێت”.
ڕه‌وف سه‌عدوڵا، به‌ڕێوبه‌ری‌ به‌شی‌ خوێندنی‌ كوردی‌ له‌كه‌ركوك به‌وه‌كاله‌ت له‌باره‌ی‌ ڕه‌وشی‌ قوتابخانه‌كان پاش ڕوداوه‌كانی‌ 16ی‌ ئۆكتۆبه‌ر به‌ئاوێنه‌ی‌ ڕاگه‌یاند “كردنه‌وه‌ی‌ قوتابخانه‌كان له‌ 22-10 له‌وه‌ی‌ چاوه‌ڕێمان ده‌كرد زیاتر بو، به‌ڵام هێشتا وه‌ك پێویست نیه‌ هێشتا هه‌ندێك نه‌گه‌ڕاوه‌ته‌وه‌ ، له‌گه‌ڵ ئه‌وه‌ی‌ به‌شێك له‌مامۆستایان هه‌ست به‌خه‌مێكی‌ گه‌وره‌ ده‌كه‌ن به‌ڵام ده‌وامیان كرد، هه‌ندێ‌ ناوچه‌نه‌بێت كه‌نزیك بون له‌شه‌ڕه‌كانه‌وه‌، ئه‌وه‌ش ڕاسته‌ هه‌ندێك گه‌ڕه‌كمان هه‌یه‌ ژماره‌ی‌ قوتابیه‌كان ئه‌وه‌نده‌ كه‌م بون نه‌یان توانیوه‌ وانه‌ بخوێنن، به‌ڵام له‌گه‌ڵ ئه‌وه‌شدا ئێمه‌ ئاگاداریمان به‌نوسراوی‌ فه‌رمی‌ نیه‌، به‌ڵكو له‌ڕێگه‌ی‌ ڕاگه‌یاندنه‌وه‌ بوه‌ له‌و بڕوایه‌دام ڕۆژبه‌ڕۆژ ژماره‌ی‌ ئاماده‌بون زیاتر ئه‌بێت، وه‌ئه‌وانه‌ش كه‌ چونه‌ته‌ سلێمانی‌ یان هه‌ولێر به‌تایبه‌ت ئه‌وانه‌ی‌ هه‌ولێر پێیان وتراوه‌ كه‌ گه‌ر ناگه‌ڕێنه‌وه‌ بابه‌پێی‌ شوێنی‌ نیشته‌جێبونیان دابه‌ش ببن له‌قوتابخانه‌كان، جگه‌له‌وه‌ هه‌ندێك كه‌س هه‌یه‌ دیارن یان پله‌یه‌كی‌ زۆر به‌رزیان هه‌یه‌ خۆیان ناتوانن ده‌وام بكه‌ن”.
ڕه‌ووف سه‌عدوڵا وتیشی‌ “وه‌ك ده‌زانین دانانی‌ به‌ڕێوبه‌ره‌كان به‌ڕێكه‌وتن بوه‌ له‌گه‌ڵ ئه‌وه‌شدا زۆربه‌یان ده‌وامیان كردوه‌ پێشمان وتون كه‌ ئه‌و سیسته‌مه‌ی‌ پێشتر له‌سه‌ری‌ ڕۆشتیوین كه‌ زۆرجار ڕێكه‌وتنی‌ حیزبی‌ بوه‌ ئه‌وه‌ په‌یڕه‌و ناكه‌ین، به‌ڵكو داوایان لێده‌كه‌ین به‌رده‌وام بن له‌ خوێندن به‌شێوه‌یه‌كی‌ پیشه‌ییانه‌”.
به‌ڕێوبه‌ری‌ خوێندنی‌ كوردی‌ له‌كه‌ركوك ڕاشیگه‌یاند “خوێندنی‌ كوردی‌ له‌مه‌ترسیدایه‌ بۆیه‌ ئێمه‌ خه‌می‌ ئه‌وه‌ ده‌خۆین و ده‌بێت سه‌رجه‌م مامۆستایان وبه‌ڕێوبه‌ره‌كان زۆردڵسۆزانه‌ ده‌وام بكه‌ن، وا ئه‌زانین كه‌ كوردایه‌تی‌ و نیشتمان په‌روه‌ری‌ ته‌نها به‌چه‌ك هه‌ڵگرتنه‌، به‌ڵام زۆر خه‌باتی‌ مه‌ده‌نی‌ تر هه‌یه‌ له‌وانه‌ مامۆستایان و قوتابیان بگه‌ڕێنه‌وه‌ بۆ شاره‌كه‌ی‌ خۆیان، زۆرجار به‌داخه‌وه‌ ئێمه‌ په‌نا ده‌به‌ینه‌ به‌ر ڕاكردن یان فێرین له‌ڕاگه‌یاندنه‌كانه‌وه‌ قسه‌ بكه‌ین فێری‌ ئه‌وه‌ نین كه‌ به‌رگری‌ بكه‌ین هه‌مو كه‌سێك له‌شوێنه‌كه‌ی‌ خۆی‌ خۆڕاگربێت و درێژه‌ به‌مانه‌وه‌ بدات، له‌ زۆر وڵاتدا له‌ گه‌ڕه‌كێك شه‌ڕه‌و له‌وه‌ی‌ تر درێژه‌ به‌ خوێندن ده‌درێت، به‌ڵام به‌داخه‌وه‌ له‌لای‌ ئێمه‌ بوه‌ به‌باو هه‌ر ته‌قه‌یه‌ك بكرێت راده‌كه‌ن ئه‌وه‌ش ترسناكه‌ پێویسته‌ خۆراِگربین”.
به‌ڕێوبه‌ری‌ به‌شی‌ خوێندنی‌ كوردی‌ له‌كه‌ركوك داواده‌كات “هه‌ر مامۆستایه‌ك نه‌هاتۆته‌وه‌ بگه‌ڕێنه‌وه‌ بۆ قوتابخانه‌كانیان، ئه‌و شتانه‌ی‌ هه‌ندێك ڕاگه‌یاندن باسی‌ ده‌كات له‌ڕاستیدا به‌وشێوه‌یه‌ نیه‌”
نزیكه‌ی‌ هه‌شتا بۆ سه‌د هه‌زار خوێندكار له‌لایه‌ن شه‌ش هه‌زارو شه‌سه‌د مامۆستاوه‌ وانه‌یان پێده‌وترێته‌وه‌ له‌چوارسه‌دو په‌نجا قوتابخانه‌ی‌ خوێندنی‌ كوردی‌ له‌شاری‌ كه‌ركوك.



نووسراوه‌ له‌لایه‌ن
Parwarday Maxmur

“خوێندنی‌ كوردی‌ له‌كه‌ركوك له‌مه‌ترسیدایه‌، گه‌ر فریای‌ نه‌كه‌ون” Reviewed by Xwendga Kurdish on 10:23:00 ص Rating: 5

ليست هناك تعليقات:

نموذج الاتصال

الاسم

بريد إلكتروني *

رسالة *

يتم التشغيل بواسطة Blogger.