مامۆستا عباس محمد: لەریگای پەروەردەوە،تاکی کوردستانیمان ڕاهێنا بڕوایان بە کیانێکی سەربەخۆ هەبێت ..

ئەمەی لە خوارەوە دەتخوێننەوە چاوپێکەوتنێکی رادیۆیی هێلینەلەگەڵ مامۆستا عباس محمد،بەڕێوەبەری پەروەردەی مەخموور لە بەرنامەی( رێ نوێن )

ئامادەکردنی :ستافی سایتی پەروەردەی مەخموور

پرسیار:سەرەتا دەمانەوێت بپرسین، بەرێز مامۆستا عباس ئێوە وەکو کادیرێکی پەروەردەی فەلسەفەی پەروەردە لای ئێوە چی دەگەیەنێت ،بەمانایەکیتر دەتانەوێت لەرێگای پەروەردەوە چی ببەخشنە کۆمەڵگا ؟

مامۆستا عباس :فەلسەفەی ئێمە لە وەزارەتی پەروەردە کار دەکەین لەسەر پێگەیاندنی نەوەیەکی هۆشیار و مۆدێرن و پڕ زانست و مەعریفە ، دڵسۆز بۆ خاک و نیشتیمان ،خاڵی لە رق و توندوتیژی و توندڕەویی،رەوشت بەرز و رۆشنبیر و داهێنەر ، ئامانجی ئێمە گەیاندنی تاکی کوردەستانیە بە گەیشتنی ئاستی زانستی و رۆشنبیری بە هەر تاکێکی ئەوروپایی و ئەمەریکایی و وڵاتانی تری پێشکەوتووی دنیا .

پرسیار : لەماوەی ٢٦ ساڵی وەزارەتی پەروەردە لەم بارەیەوە هەوڵەکانتان جێگای خۆی گرتوە لە پێناوی ئەو ئامانج و فەلسەفەیەی باسی دەکەی ؟

مامۆستا عباس محمد :دەتوانین بڵیین بە هەوڵی هەموو لایەک و سیاسەتێکی پەروەردەیی کە حکومەتی هەرێم پەیڕەوی کردووە ئیستا خاوەنی سیستەمیکی مۆدێرنی رێک و پێکین و بەردەوام لیژنە و گروپی جۆراو جۆریش لە هەوڵی گۆرانکاری و بەرەوپیش بردنیدان ،لەم سیستەمەدا لە پڕپگرامەکاندا جگە لەوەی ئاستی زانستی پڕۆگرامەکان هاوتای وڵاتانی پێشکەوتوو کراوە، لەهەمان کاتیشدا حیساب بۆ کەلتور و هۆشیاری کۆمەڵگای کوردی کراوە ، ئەگەر دیقەت بدەین ئیستا مناڵان و قوتابیان و گەنجانی کوردستان بروای تەواویان بە مافی مرۆڤ و دیموکراتی و مافی مناڵ و ئاژەڵ و پاراستنی ژینگە و یەکسانی تەواوی ژنان و ئافرەتان هەیە ، ئەمە لەکویوە هاتووە ؟ هەموو ئەمانە لە سیستەمی پەروەردە لە قۆناغە جیاوازەکانی خوێندن جێگای کراوەتەوە و ووردە ووردە بۆتە کەلتووری باوی کۆمەڵگا .

 مافی بڕیاردانی جارەنووس، شارەزایی لە مێژوو و جوگرافیای کوردستان، شارەزایی لە کەلتور و زمانی خەڵکی کوردستان،بەسەرهات و کارەسات و دەربەدەری و شۆرش و ڕاپەڕین و قوربانیدانەکانی، بۆتە بەشێک لە سیستەمی خوێندن لە کوردستان و چۆتە نێو هزر و ناخی تاکی کورد،بۆیە ئیستا دەبینین ئەو نەوەیە سەرەڕایی ئەوەی خۆی لەناو رووداوەکانی سەدەی رابردوو نەبووە، بەڵام بە دڵ و بەگیان دەیەوێت خاوەنی کیانێکی سەربەخۆ بین و پشتگیری دەکا .

هەر لێرەشدا دەمەیت ئاماژە بەوە بکەم لەماوەی سەد ساڵی رابردوو تاکی کورد لەژێر دەستی رژێمە یەک لەدوایی یەکەکان، بە دەیان شێواز چەوسێندراوەتەوە و شکێندراوە، کەسایەتی لەکەدار کراوە بۆیە ئێمە لە پەروەردە ئەرکێکی قورسمان لەسەر شان بووە و دەبیت کە شکۆ بۆ تاکی کوردستانی بگەرینینەوە ، هەنگاومان ناوە و دەبێت زیاتر و بەردەوام بین ، هەموو ئەو وەزعە ناخۆشانەی باسمان کرد تەنها یەک شتی فێرکردین کە دەبیت تاکەکان رابهێنین و گۆش بکەین بە پرەنسیپەکانی مافی مرۆڤ و پاراستنی ژینگە و دیموکراسی و دلسۆزی بۆ خاک و خۆڵی نیشتیمان و بیانکەین بە خاوەنی قسە و قراری خۆیی .

پرسیار: لێرەدا دەمانەوێت زیاتر لەسەر ئەم پرسەدا بوەستین ، ئێوە وەکو وەزارەتی پەروەردە لە رووی عەمەلیەوە هەنگاوی چیتان ناوە بۆ گۆشکردنی مناڵان و قوتابیان بە هەستی نەتەوەیی و نیشتیمانی ..؟

مامۆستا عباس : ئێمە هەوڵمانداوە تاکی کورد خاوەنی بڕیاری خۆی بێت، بتوانێت لەهەموو پرسە نەتەوەیی و نیشتیمانی و کاروبارەکانی رۆژانەی خاوەنی بڕیار و هەڵبژاردەی خۆی بێت، مێژووی کوردمان نیشانداوە و شۆرش وشەهید و قوربانیەکانمان بۆ ژماردوون و هەڵویستی وڵاتانی دراوسێشمان پێیان ئاشنا کردوە ، بۆیە گومانمان لەوە نیە خاوەی ئیرادەیەکی راست و ڕەوانە لە دیاریکردنی جارەنوسی خۆیی و دەیەویت کیانیکی سەربەخۆیی خۆی هەبێت و چیتر هەست بە مەترسیەکان نەکات و شکۆ و شەقسیاتی نەشکێندریت .

پرسیار :لایەنێکیتر کە دەمانەوێت ئاماژەی بۆ بکەین ،کارکردنە لەسەر دەروونی تاکی کورد کە بەدرێژایی مێژوو دوژمنان هەوڵیانداوە لەپاڵ شەڕەکانیتریان شەری دەروونیشمان بکەن ، لە سیستەمی پەروەردەی هەرێمی کوردستان لەم بارەیەوە چیتان کردوە کە ئەرکێکی گەورەتان دەکەوێتە سەر شان ؟

مامۆستا عباس :پێشتر باسم لەوە کرد بەهۆی شەڕ و ململانێ و جەنگە یەک لەدوای یەکەکان، دەروونی تاکی کورد وێرانکراوە،بە ترس و تۆقاندن و شکاندن ! ئێوە هەر سەیرکەن چەند ساڵێک لەمەو پێش تیرۆرستانی داعش بە چ شێوەیەکی دڕندانە ترسی لەنێو دڵ و دەروونی خەڵک دەچاند ، ئێمە لە سیستەمی پەروەردە و فیرکردن گرینگیەکی زۆرمان بەم لایەنە داوە ، ئەگەر سەیریکی پرۆگرامەکانی خوێندن بکەیت لە قۆناغە جیاوازەکان دەبینین تاکی کوردستانی لەسەر ئازایەتی،بەرەنگاری،ئیرادە و خۆڕاگری رادەهێنێت،بۆیە دەبینین کاتێک تیرۆرستانی داعش جەند ساڵیک بەر لە ئیستا دەبێتە مەترسی خەڵکی کوردستان ج بەرەنگارییەکی جوان نیشانی هەموو دنیا دەدەن ،هەر لەم پەروەردەی مەخموورە مامۆستایان لەنزیک سنوورەکانی تیرۆرستانی داعش قوتابخانەکانیان چۆل نەکرد و وانەیان بە قوتابیان دەگوتەوە، دەیان و سەدان نمونەیتر لەبەر دەستان  کە ئەمە شانازییەکی گەورەیە بۆ هەموومان ،ئەمە جگە لەوەی بۆنە و موناسباتە نیشتیمانیەکان ، ئەنفال و کیمیاناران و قڕکردنی خەلکی کوردستان و داستان و شۆرشەکان و سەرکردە و رابەرەکانی شۆڕشەکانی کوردستان و سەربەخۆیی و دامەزراندنی کیانێکی سەربەخۆ، بەشێکە لە جالاکی و کۆر و سیمینار و ووتار و نەخشەی سەر دیواری قوتابخانەکان ،ئەمە جگە لەوەی مامۆستایان و بەڕیوەبەری قوتابخانەکان لە ووتاری رۆژانە و هەفتانەیان دڵسۆزانە توانیویانە گیانی بەرەنگاری و بروابەخۆ بوون و هیواو و ئاوات لەنێو هزری گەنجان و منالان بچێنن،هەنگاوی باشمان لەم بارەیەوە بڕیوە و هێشتاش کار و پرۆژەی زۆرمان ماوە و یموحمان لەم بارەیەوە زیاترە .

نووسراوه‌ له‌لایه‌ن
Parwarday Maxmur