پیاوێک دوای سێ هەفتە كڕكەوتن لەسەر 10 هێلکە یەكەم جوجكی هەڵهێنا

هونەرمەندێكی فەڕەنسی دوای سێ هەفتە كڕكەوتن لەسەر 10 هێلكە لە مۆزەخانەیەكی شاری پاریس یەكەم جوجكی خۆی هەڵهێنا.

ئەمڕۆ ماڵپەڕی تەلەگرافی بەریتانی بڵاویكردەوە، ئەبراهام پۆینچیڤاڵ، هونەرمەندی فەڕەنسی، كە لە 29ی ئازاری ڕابردووەوە لەناو خانویەكی شوشەییدا لەمۆزەخانەی پالاس دێ تۆكیۆ بۆ هونەری مۆدێرن لە پاریسی پایتەختی فەڕەنسا بۆ هەمووان خۆی نمایش كردووە، ئەم هەفتەیە یەكەم جوجكی خۆی هەڵهێناوە. 

ئەبراهام پۆینچیڤاڵ پێشتر لەناو كەوڵی ورچێكدا بۆ ماوەی دوو هەفتە ژیا و هەروەها بۆ ماوەی هەفتەیەك لەناو بوتڵێكی گەورەی داخراو و بەردێكی گەورەدا ژیا و باوكیشی حەپێكی داهێنا كە وادەكات بۆنی غازاتی مرۆڤ وەكو بۆنی گوڵ بێت.

ئەوانەی سەردانی مۆزەخانەكە دەكەن ڕاستەوخۆ ئەو دەبینن لەسەر هێلكەكانی كڕكەوتووە و هەروەها لەڕێگای كەناڵێكی ڕاستەوخۆی یوتیوبەوە كڕكەوتنەكەی پەخشدەكات.

ئەو هونەرمەندە كە تەمەنی 44 ساڵە، هێشتا نۆ هێلكەی دیكەی ماوە هەڵیبهێنێت پێش ئەوەی بتوانێت بگەڕێتەوە بۆ لای دوو منداڵەكەی خۆی. 

وتەبێژێك بەناوی مۆزەخانەكەوە ڕایگەیاندووە “كڕكەوتنی ئەو  زۆر سەخت بووە و ئەو لەسەر هێلكەكان نووستوە. لایەنێكی سەختی كڕكەوتنەكەی بریتیە لە پلەی گەرمای ناو شوشەكە كە پێویستە لە 37 پلەی گەرمای سەدیدا ڕابگیرێت”.

ئەو لەماوەی  24 كاتژمێردا تەنها نیو كاتژمێر مۆڵەتی هەیە و بە بەردەوامی پێویستە لەسەر هێلكەكانی دابنیشێت.

 

 

 

 

سه‌رچاوه‌: خه‌ندان

 

نووسراوه‌ له‌لایه‌ن
qasm srush