بڕیارێکی وەزارەتی دارایی بۆ مامۆستایان بڵاو دەکرێته‌وه‌

بەپێی نوسراوێکی وەزارەتی دارایی و ئابوری حکومەتی هەرێمی کوردستان بڕە پارەیەکی دیاریکراو بۆ مامۆستایان خەرج دەکرێت.

 

بەپێی نوسراوی ژمارە 15949كە لە بەرواری 11ی 1ی 2017 بە واژووی رابەر سدیق بریكاری وەزارەتی دارایی دەرچووەو ئاراستەی وەزارەتی پەروەردەی حكومەتی هەرێمی كوردستان كراوە، تێیدا ئاماژە بەوەكراوە لەسەر راسپاردەی سەرۆكایەتی ئەنجومەنی وەزیران و لە پێناو بەرژەوەندی پرۆسەی خوێندن و بارودۆخی دارایی مامۆستایان بڕیاردرا بە خەرجكردنی پارەی هاندان بۆ سەرجەم بەڕێوەبەری قوتابخانەكان و یاریدەدەری بەڕێوەبەری قوتابخانەو مامۆستایان و توێژەرە كۆمەڵایەتیەكانی میلاكی وەزارەتی پەروەردە.

بەپێی نوسراوەكەی وەزارەتی دارایی پێدانی پارەی هاندانەكە بەم شێوەیە دەبێت، بڕی 150 هەزار دینار بۆ بەڕێوەبەری قوتابخانەكان و یاریدەدەری بەڕێوەبەری قوتابخانەو مامۆستایان و توێژەرە كۆمەڵایەتیەكانی قوتابخانەكان كە لەدەرەوەی سەنتەری پارێزگاكان و قەزاكان دەوام دەكەن.
هەروەها ئاماژە بەوەشكراوە، ئەم هاندانە تەنها بۆ ئەو توێژەرانە خەرج دەكرێت كە لەسەر میلاكی قوتابخانەكانن و دەوام دەكەن و ئەم هاندانە ئەم مامۆستایانەش ناگرێتەوە كە تەنسیب كراون بۆ دەمودەزگاكانی ترو لە قوتابخانەكان دەوام ناكەن و هەروەها هاندانەكە لەسەرجەم مۆڵەتەكاندا دەبڕدرێت جگە لە مۆڵەتی ئاسایی و مۆڵەتی پێش لە دایكبوون كە (21) رۆژە.
لەبەشێكی تری نوسراوەكەی وەزارەتی دارایی روونیشكراوتەوە، دەبێت مامۆستایان شەوانەی هەفتانەیان تەواو بكەن و بە پێچەوانەوە بۆ ماوەی مانگەكە بۆیان خەرج ناكرێت و ئەم بڕگەیە لە 15ی 1ی 2016 وە مانگانە بە لیستی جیا خەرج دەكرێت و رێنماییەكەش لە رێكەوتی 1ی 12ی 2016 وە جێبەجێدەكرێت.

نووسراوه‌ له‌لایه‌ن
user post