مامۆستايانى ناڕازى: شه‌ممه‌ خۆپيشاندانى به‌رفراوانه‌

له‌ كۆنگره‌يه‌كى رۆژنامه‌وانيدا نوێنه‌ر و ئه‌ندامانى ئه‌نجوومه‌نى مامۆستايانى ناڕازى رايانگه‌ياند، ئێمه‌ بايكۆت ناشكێنين و رۆژى شه‌ممه‌ خۆپيشاندانى به‌رفراوان ئه‌نجام ده‌ده‌ين.

ئه‌مڕۆ به‌ڕێوبه‌رايه‌تى په‌روه‌رده‌ى سلێمانى و ئه‌نجوومه‌نى پارێزگاى سلێمانى له‌ كۆنگره‌يه‌كى رۆژنامه‌وانييدا رايانگه‌ياند، رۆژى شه‌ممه‌ ده‌وامه‌ و هه‌ر مامۆستايه‌ك ده‌وام نه‌كات سزا ده‌درێت.

دواى ئه‌و راگه‌ياندنه‌ى ئه‌نجوومه‌نى پارێزگاى سلێمانى و په‌روه‌رده‌، كه‌مێك پێش ئێستا له‌ كۆنگره‌ رۆژنامه‌وانيدا نوێنه‌رانى مامۆستايان گوتيان: ئێمه‌ ئه‌و هه‌وڵه‌ بێ به‌رهه‌مه‌ ره‌تده‌كه‌ينه‌وه‌ و درێژه‌ به‌ خۆپيشاندان و بايكۆت ده‌ده‌ين.

هه‌روه‌ها رايانگه‌ياند،  حكومه‌ت له‌ ماوه‌ى رابردوودا چه‌ندين به‌ڵێنى پێداويين و هيچ كاميانى جێبه‌جێ نه‌كردووه‌.

روونيشيانكرده‌وه‌، له‌ ماوه‌ى رابردوودا ژماره‌يه‌ك به‌ڵێن درابوون به‌ڵام هيچيان جێبه‌جێ نه‌كراوون له‌وانه‌: خه‌رج نه‌كردنى نيومووچه‌ى مانگى 9ى 2015، خه‌رج نه‌كردنى ده‌رماڵه‌ى هاتوچۆ، دوانه‌كه‌وتنى چاره‌كه‌ مووچه‌.

ئه‌و مامۆستا ناڕازييانه‌ دووپاتيان كرده‌وه‌، كه‌ ئه‌وان سازش له‌سه‌ر مافه‌كانيان ناكه‌ن و رۆژى شه‌ممه‌ 12ى 11ى 2016 خۆپيشاندانى سه‌رتاسه‌رى و به‌رفراوان ئه‌نجام ده‌ده‌ن.