لەسەر وەرگرتنی پارە لەخوێندکاران روونکردنەوە دەدرێت

بەرێوەبەری تەکنیکی لەبەرێوەبەرایەتی گشتی پەروەردەی سلێمانی ڕەتیدەکاتەوە کەلەبەرامبەر وەرگرتنی خوێندکار لەقۆناغی یەکی بنەڕەتی تا ١٢ی ئامادەیی ھاوشێوەی خوێندکارانی زانکۆ پارە بۆ تۆمارکردنیان وەربگیرێت و لەسەر وادەی گەڕانەوەی ئەنجامی تانەکانی خولی دووەمی تاقیکردنەوە نیشتمانیەکانیش  دەدوێت.

نورەدین عوسمان بەرێوەبەری تەکنیکی لەبەرێوەبەرایەتی گشتی پەروەردەی سلێمانی لەلێدوانێکدا بۆSNNرەتیکردەوە کە لەبەرامبەر وەرگرتنی خوێندکار لەقۆناغی یەکی بنەڕەتی تاکو  قۆناغی ١٢ی ئامادەیی ھیچ بڕە پارەیەک وەربگیرێت و وتی: ھیچ رێنماییەکی لەوشێوەیە دەرنەچووەو ھاوڵاتیانیش دڵنیادەکەینەوە کە وەرگرتنی خوێندکاران ناکرێتە پارە و تائێستا ھیچ خوێندکارێکیش پارەی لێوەرنەگیراوە.

لەبارەی راگەیاندنی ئەنجامی تانەی خولی دووەمی تاقیکردنەوە نیشتمانییەکانی قۆناغەکان ٩ی بنەڕەتی و ١٢ی ئامادەیی، نورەدین عوسمان وتیشی: لیژنەیەکی تایبەت سەرجەم تانەکانیان کۆکردۆتەوە و بەپێی زۆری و کەمی رێژەی تانەکانەوە لیژنەکان دەستبەکاردەبن و ھەر کات کارەکانیان بەکۆتا ھێنا ئەنجامی بەدواچوونەکان رادەگەیەنن.

لێدوانەکەی ئەو بەرپرسەی پەروەردە لەکاتێکدایە دەنگۆی ئەوە بڵاوکراوەتەوە کە بۆ وەرگرتنی خوێندکاران لە قۆناغی یەکی بنەرەتی تاکو  قۆناغی ١٢ی ئامادەیی لەبەرامبەر تۆمارکردنیان لەخوێندنگەکان بڕە پارەیەکیان لێدەسەندرێت، جگەلەوەش لەکاتی ئەنجامدانی گواستنەوەی خوێندکار لەنێوان خوێندنگاکاندا بەھەمان شێوەیە بڕە پارەیەکیان لێوەردەگیرێتەوە.