وەزیری پەروەردە هۆکاری دواکەوتنی ئەنجامی تاقیکردنەوەکان ئاشکرا دەکات

رووداو – سلێمانی

وەزیری پەروەردە لەبارەی راگەیاندی ئەنجامی تاقیکردنەوەکان خوولی دووەمی قۆناخی 9ی بنڕەتی و 12ی ئامادەیی دەڵیت، بەهۆی هەندێک کێشەی تەکنیکی راگەیاندنی ئەنجامەکان دواخراوە.

رۆژی پێنجشەممە 8-9-2016 د.پشتیوان سادق، وەزیری پەروەردەی هەرێمی کوردستان لەبارەی مووچەی مامۆستایان و دواکەوتنی ئەنجامی تاقیکردنەوەکان لە شاری سلێمانی کۆنفرانسێکی رۆژنامەڤانی ئەنجامدا.

لەبەشێکی قسەکانیدا وەزیری پەروەردە گوتی “بڕیار بوو نیوەڕی رۆژی پێنجشەممە 8-9-2016 ئەنجامی تاقیکردنەوەکانی خولی دووەمی خوێندن رابگەیێنین، بەڵام بەهۆی هەندێک کێشەی تەکنیکی چەند کاتژمێرێک راگەیاندنی ئەنجامی تاقیکردنەوەکانی خولی دووەم دوادەخەین”.

وەزیری پەروەردەی هەرێمی کوردستان ئاماژەی بەوەشکرد، هیوادارین خوێندکار و قوتابییەکان ئەنجامەکانیان بەدڵی خۆیان بێت و لەشوێنی گونجاو وەربگیرێن و ئەوانەیشی دەرنەچوون نیگەران نەبن و ساڵێکی دیکە هەوڵبدەن بۆ دەرچوون”.

بەرەبەیانی رۆژی پێنجشەممە وەزارەتی پەروەردە راگەیێندراوێکی بڵاوکردەوە و رایگەیاند “رۆژی پێنجشەممە 8-9-2016 ئەنجامی کۆتایی خولی دووەمی پۆلە کۆتاکان 9ی بنەڕەتی و 12ی ئامادەیی لە لایەن بەڕێوەبەرایەتی ئەزموونەکانی وەزارەتەوە رادەگەیێنرێت”.

ئەمساڵ 263 هەزار و 954 قوتابی و خوێندکاری پۆلەکانی (نۆیەمی بنەڕەتی و دوانزەی ئامادەیی و پیشەییەکان)، بەچاودێری 54 هەزار و 301 چاودێر و بەڕێوەبەر و یاریدەدەر لە 4 هەزار و 270 هۆڵ لە خوولی یەکەم تاقیکردنەوەیان ئەنجامدا.

The post وەزیری پەروەردە هۆکاری دواکەوتنی ئەنجامی تاقیکردنەوەکان ئاشکرا دەکات appeared first on رێڤەبەریا پەروەردا قەزا دهوك روژئاڤا.

نووسراوه‌ له‌لایه‌ن
azad nisry